汝有听着地球崩落去兮声无？
汝有看着河流断在阮兮目眶内底
一山在阮兮心脏面顶走动无？
汝看！汝看！汝看彼囝仔倒在瓦砾仔堆里
无头也无脚
只有双手拦着一只惦惦兮凯蒂猫当作面
目目周剥金金直直看着汝
亲像在问︰
汝有看着吾兮父母兄弟姊妹无？
吾夭有机会咯看着日头夹月娘无？
其实阮兮身躯就是大地震兮现场
震动了后
位头到尾 汝吾兮骨头夹血脉拢已经散位
汝吾兮头壳夹目目周拢已经离线轴
因此阮所看着兮 才会是天地裂 才会是山河崩 才会是骨肉散
现在汝有看着吾兮心肝无？
置这 置遐
吾兮心肝夭在断去兮河流面顶浮动
夭在崩落来兮山脚滚动
走冲
汝有听着地球崩落去兮声无？
汝有看着火金姑为阮乡亲兮灵魂照路
四界去找阮坏去兮身躯无？
汝看！汝看！汝看彼人倒在断崭面顶
无头也无面
只有双手拦着一粒夭置噗噗跳兮心
亲像日头涨到红红红
亲像在讲︰
这就是阮兮尸体
这就是阮大家等待魂魄转来重建兮故乡！